• UZEIk garatutako hainbat hiztegi espezializatutan Euskaltermeko emaitzak integratu dira

Guztira 1.379 sarrera biltzen dituen glosario elebidunak (euskara-ingelesa) kontsulta-aukera berria du: botoi batekin klik eginez, Euskaltermen zuzenean egin daitezke bilaketak.

Guztira 1.379 sarrera biltzen dituen glosario elebidunak (euskara-ingelesa) kontsulta-aukera berria du: botoi batekin klik eginez, Euskaltermen zuzenean egin daitezke bilaketak. Funtzionalitate horri esker, erabiltzaileek MZT hiztegian agertzen ez diren terminoak ere kontsultatzeko aukera dute, Euskalterm Terminologia Banku Publikoaren bidez.

Euskaltermeko emaitzak UZEIren hiztegi espezializatuetan integratuta

Berrikuntza hori, ordea, urrats zabalago baten parte da. Izan ere, UZEIren hainbat hiztegi espezializatutan Euskaltermeko emaitzak integratu dira, erabiltzaileek terminologia-kontsulta osatuagoa egiteko aukera izan dezaten. Hemendik aurrera, erabiltzaileak UZEIren hiztegietan bilaketa bat egiten duenean, sistemak automatikoki kontsultatuko du Euskalterm ere. Bilatutako terminoa hiztegian ez badago, Euskaltermen bilatuko du, eta emaitzak zuzenean erakutsiko dira aplikazio berean, iturria argi adierazita. 

Integrazio berria UZEIren hainbat hiztegitan txertatu da, besteak beste: Klima-aldaketa eta trantsizio ekologikoa hiztegian, Arkitektura hiztegian, Kirolkidea lexikoetan, Tourraren terminologian eta Tostako arraunketaren terminologian. Horrela, erabiltzaileek bi iturri nagusiren terminologia modu bateratuan kontsultatu ahal izango dute, bilaketa-esperientzia errazteko eta informazio osagarri gehiago jasotzeko.

Garapen horretarako, Eusko Jaurlaritzaren Kultura eta Hizkuntza Politikako Sailaren laguntza izan du UZEIk.

Hurrengo urratsak

Oraingoz definiziorik ez eskaintzea erabaki bada ere, MZT hiztegiko sarrera bakoitzak “testuingurua” eremua dauka, MZT Kongresuko 2018ko edizioan terminoa nola erabili zen kontsultatzeko.

Proiektuan UZEIrekin lankidetzan aritu ziren erakunde hauetako 11 aditu: CEIT, Leartiker, Mondragon Unibertsitatea, Tecnalia eta Euskal Herriko Unibertsitateko Gipuzkoako Ingeniaritza Eskola, Polymat eta Zientzia eta Teknologia Fakultatea.

Baliabide hau Materialen Zientzia eta Teknologiaren arloko komunitatearentzat tresna baliagarria da, terminologiaren erabilera bateratua eta koherentea sustatzeko. Euskaltermeko integrazioari esker, gainera, erabiltzaileek terminologia-iturri publiko eta estandarizatu baten edukia zuzenean kontsultatu ahal izango dute, hiztegi espezializatuaren osagarri gisa.

Etorkizunean, lexikoa eguneratuz joango da eta hurrengo kongresuetan sortuko diren termino berriak gehituko zaizkio. Era berean, UZEIren hiztegi digitalek terminologia-kontsulta bateratua eskaintzen jarraituko dute, euskarazko baliabide tekniko eta zientifikoen erabilera errazteko.

Glosarioa kontsultatzeko: https://mzt.uzei.eus/mzt-hiztegia/