Hizkuntza erromantzeetako terminologiaz gain, euskarazko 200 termino baino gehiago ditu lexikoak.

Frantziako Kultura Ministerioari atxikita dagoen Frantseserako eta Frantziako Hizkuntzetarako Ordezkaritza Nagusiak (DGLFLF) prestatu du 2023ko Munduko Errugbi Koparen atarian, erakunde hauen lankidetzaz: Terminologia Panlatinoko REALITER Sarea, Okzitanieraren Bulego Publikoa, Okzitanieraren Biltzar Iraunkorra eta UZEI Terminologia eta Lexikografia Zentroa. Errugbilarien eta zaleen artean hizkuntza erromantzeetako eta euskarazko terminologia zabaltzea du helburu hiztegiak.

Jokalarien posizioekin, teknika orokorrekin, defentsa- eta eraso-teknikekin, arauekin, faltekin eta zigorrekin eta baita jokalariek behar duten funtsezko ekipamenduarekin lotutako 200 termino baino gehiago biltzen ditu, katalanez, Espainiako eta Argentinako espainieraz, Quebeceko eta Frantziako frantsesez, galizieraz, italieraz, Portugalgo eta Brasilgo portugesez, errumanieraz, okzitanieraz (okzitaniera komuna, auverniera, gaskoia, languedocera, limousinera, proventzera) eta euskaraz.

Deskargatu lexikoa: DGLFLF-Vocabulaire_panlatin_du rugby_2023